بڑھاؤ ہاتھ بڑھاؤ فقیر موج میں ہے

بڑھاؤ ہاتھ بڑھاؤ فقیر موج میں ہے

تونگرو ادھر آؤ فقیر موج میں ہے

جسے بھی چاہیے خیرات نور لے جائے

بھڑک رہا ہے الاؤ فقیر موج میں ہے

خرید لے نہ تمہاری یہ کائنات تمام

اسے بتانا نہ بھاؤ فقیر موج میں ہے

گرا ہوا تو نہیں ہے زمیں کو تھامے ہے

زمین سے نہ اٹھاؤ فقیر موج میں ہے

بس اک طریقہ ہے اس کے قریب جانے کا

دھمال ڈالتے جاؤ فقیر موج میں ہے

ابھی تم اس کی نگاہوں سے دو جہاں دیکھو

ابھی سبو نہ اٹھاؤ فقیر موج میں ہے

خموش بیٹھا ہوا ہے خموش رہنے دو

اور اپنی خیر مناؤ فقیر موج میں ہے

barhao hath barhao faqir mauj mein hai

tawangaro idhar ao faqir mauj mein hai

jise bhi chahiye khairat nur le jae

bharak raha hai alao faqir mauj mein hai

kharid le na tumhari ye kainat tamam

use batana na bhao faqir mauj mein hai

gira hua to nahin hai zamin ko thame hai

zamin se na uthao faqir mauj mein hai

bas ik tariqa hai us ke qarib jane ka

dhamal dalte jao faqir mauj mein hai

abhi tum us ki nigahon se do jahan dekho

abhi subu na uthao faqir mauj mein hai

khamosh baitha hua hai khamosh rahne do

aur apni khair manao faqir mauj mein hai