تیور بھید بتاتے ہیں یہ نم آلود ہواؤں کے

تیور بھید بتاتے ہیں یہ نم آلود ہواؤں کے

آج ذرا کھل کھیلنے والے ہیں انداز گھٹاؤں کے

کمرہ بند کیا اور سارے ضبط کے بندھن ٹوٹ گئے

آنکھیں ڈھیلی چھوڑیں رستے کھول دیے دریاؤں کے

دوگانہ آزار ہے صاحب ہم جیسوں کی قسمت میں

ہم محتاج رویوں کے اور ہم مجبور اناؤں کے

دیکھ لے کتنے کشٹ اٹھا کر تیرے در تک پہنچا ہوں

دیکھ لے پپڑی ہونٹوں کی اور دیکھ لے چھالے پاؤں کے

کھائیاں ہیں کھڈے روڑے ہیں کنکر پتھر ہیں لیکن

جنت کے رستے لگتے ہیں سارے رستے گاؤں کے

ان کی چاہ میں قریہ قریہ بستی بستی گھوم لیے

ان کی چاہ میں کونے کھدرے چھان لیے صحراؤں کے

ہم جو بزم غیر میں اکثر ان کی باتیں کرتے ہیں

تپتی دھوپ میں لطف لیا کرتے ہیں ٹھنڈی چھاؤں کے

توڑ کے رسم عہد وفا کو آخر چھوڑ ہی جانا تھا

پنجرے میں آ بیٹھے تھے پنچھی آزاد فضاؤں کے

ہم محراب اور منبر والوں کی آنکھوں کو چبھتے ہیں

ہم نے عقل کو رہبر مانا ہم مفرور خداؤں کے

tewar bhed batate hain ye nam alud hawaon ke

aj zara khul khelne wale hain andaz ghataon ke

kamra band kiya aur sare zabt ke bandhan tut gae

ankhen dhili chhoren raste khol diye dariyaon ke

dogana azar hai sahab ham jaison ki qismat mein

ham mohtaj rawiyon ke aur ham majbur anaon ke

dekh le kitne kasht utha kar tere dar tak pahuncha hun

dekh le papri honton ki aur dekh le chhale paon ke

khaiyan hain khadde rore hain kankar patthar hain lekin

jannat ke raste lagte hain sare raste gaon ke

un ki chah mein qarya qarya basti basti ghum liye

un ki chah mein kone khudre chhan liye sahraon ke

ham jo bazm-e-ghair mein aksar un ki baten karte hain

tapti dhup mein lutf liya karte hain thandi chhaon ke

tor ke rasm-e-ahd-e-wafa ko akhir chhor hi jana tha

pinjre mein a baithe the panchhi azad fazaon ke

ham mehrab aur mimbar walon ki ankhon ko chubhte hain

ham ne aql ko rahbar mana ham mafrur khudaon ke