فیصلے کی اس گھڑی کا التوا اچھا لگا

فیصلے کی اس گھڑی کا التوا اچھا لگا

ایک رشتہ ٹوٹنے سے بچ گیا اچھا لگا

جان من جان وفا خط میں لکھا اچھا لگا

دور سے اس نے مجھے اپنا کہا اچھا لگا

میں نے غم کی دھن بھی چھیڑی اور خوشی کا راگ بھی

تم بتاؤ گیت میرا کون سا اچھا لگا

مجھ میں کیا جوہر مرے ٹوٹے ہوئے آئینے کو

آج اس نے چاند کا ٹکڑا کہا اچھا لگا

ایک دن آئی تو پھر واپس نہ تنہائی گئی

میرے اجڑے گھر میں اس کو جانے کیا اچھا لگا

دل نہ چھوڑے گا ضدیں یہ تو وہ بالک ہے جسے

اک کھلونا مل گیا تو دوسرا اچھا لگا

پیش کر دیں میں نے فکر و فن کی تصویریں ہزار

خود پسندوں کو مگر اک آئینہ اچھا لگا

چاندنی یادوں کی تھی پروینؔ آنسو کیوں بہائے

کیا کفن پہ تجھ کو موتی ٹانکنا اچھا لگا

faisle ki us ghari ka iltiwa achchha laga

ek rishta tutne se bach gaya achchha laga

jan-e-man jan-e-wafa khat mein likha achchha laga

dur se us ne mujhe apna kaha achchha laga

main ne gham ki dhun bhi chheri aur khushi ka rag bhi

tum batao git mera kaun sa achchha laga

mujh mein kya jauhar mire tute hue aine ko

aj us ne chand ka tukra kaha achchha laga

ek din ai to phir wapas na tanhai gai

mere ujre ghar mein us ko jane kya achchha laga

dil na chhorega ziden ye to wo balak hai jise

ik khilauna mil gaya to dusra achchha laga

pesh kar den main ne fikr-o-fan ki taswiren hazar

khud pasandon ko magar ik aina achchha laga

chandni yadon ki thi parwin ansu kyun bahae

kya kafan pe tujh ko moti tankna achchha laga