کوئی کسی کی طرح ہے کوئی کسی کی طرح

کوئی کسی کی طرح ہے کوئی کسی کی طرح

بس ایک آپ کا جلوہ ہے آپ ہی کی طرح

سمٹ کے غم کے اندھیرے میں لوگ بیٹھ گئے

مگر ہمیں تو بکھرنا تھا روشنی کی طرح

یہ میرے خواب کی جنت یہ چاند کا آنگن

یہاں تو دھوپ بھی لگتی ہے چاندنی کی طرح

نظر میں شکل تری صبح آفتاب ازل

زباں پہ نام ترا حرف آخری کی طرح

ہم ان خداؤں سے جھک کر نہیں ملا کرتے

جو آدمی سے نہ ملتے ہوں آدمی کی طرح

وہ درد دشمن جاں کیسے بن گیا پروینؔ

جسے عزیز رکھا ہم نے زندگی کی طرح

koi kisi ki tarah hai koi kisi ki tarah

bas ek ap ka jalwa hai ap hi ki tarah

simat ke gham ke andhere mein log baith gae

magar hamen to bikharna tha raushni ki tarah

ye mere khwab ki jannat ye chand ka angan

yahan to dhup bhi lagti hai chandni ki tarah

nazar mein shakl tiri subh aftab azal

zaban pe nam tira harf akhiri ki tarah

ham un khudaon se jhuk kar nahin mila karte

jo admi se na milte hun admi ki tarah

wo dard dushman-e-jan kaise ban gaya parwin

jise aziz rakha ham ne zindagi ki tarah