جب کبھی کوئی کام یاد آیا

جب کبھی کوئی کام یاد آیا

تب انہیں میرا نام یاد آیا

جب یہ سوچا کہ ان سے تھی پہچان

دور ہی کا سلام یاد آیا

پھر نشیمن کی ابتری دیکھی

پھر قفس کا نظام یاد آیا

پھر وہ شب وہ سکوت کا عالم

پھر خدا کا کلام یاد آیا

آج انہیں دیکھ کر محبت کا

قصۂ ناتمام یاد آیا

ہائے ماضی کے خیریت نامے

جانے کس کس کا نام یاد آیا

بن میں دیکھا جو وحشیوں کا ہجوم

شہر کا اژدہام یاد آیا

jab kabhi koi kam yad aya

tab unhen mera nam yad aya

jab ye socha ke un se thi pahchan

dur hi ka salam yad aya

phir nasheman ki abtari dekhi

phir qafas ka nizam yad aya

phir wo shab wo sukut ka alam

phir khuda ka kalam yad aya

aj unhen dekh kar mohabbat ka

qissa-e-natamam yad aya

hae mazi ke khairiyat name

jane kis kis ka nam yad aya

ban mein dekha jo wahshiyon ka hujum

shahr ka azhdaham yad aya