زندگی کی ہنسی اڑاتی ہوئی

زندگی کی ہنسی اڑاتی ہوئی

خواہش مرگ سر اٹھاتی ہوئی

کھو گئی ریت کے سمندر میں

اک ندی راستہ بناتی ہوئی

مجھ کو اکثر اداس کرتی ہے

ایک تصویر مسکراتی ہوئی

آ گئی خامشی کے نرغے میں

زندگی مجھ کو گنگناتی ہوئی

میں اسے بھی اداس کر دوں گا

صبح آئی ہے کھلکھلاتی ہوئی

ہر اندھیرا تمام ہوتا ہوا

جوت میں جوت اب سماتی ہوئی

zindagi ki hansi urati hui

khwahish-e-marg sar uthati hui

kho gai ret ke samundar mein

ik nadi rasta banati hui

mujh ko aksar udas karti hai

ek taswir muskurati hui

a gai khamushi ke narghe mein

zindagi mujh ko gungunati hui

main use bhi udas kar dunga

subh ai hai khulkhilati hui

har andhera tamam hota hua

jot mein jot ab samiti hui