انا زدہ تھا کہیں پر کہیں پر آن زدہ

انا زدہ تھا کہیں پر کہیں پر آن زدہ

زمیں کی زد سے نکلنے تک آسمان زدہ

یہاں پہ دشت و سمندر کی بات مت کرنا

ہمارے شہر کا ہر شخص ہے مکان زدہ

خیال و خواب کے موسم بدلنے والے ہیں

ہجوم وہم و تصور میں ہے گمان زدہ

تو بال و پر کی نمائش پہ حرف آ جاتا

ہوا کا رخ نہ پلٹتا اگر اڑان زدہ

ہمارے بعد ہمیں ڈھونڈنے کے سب رستے

ہماری خاک میں مل جائیں گے نشان زدہ

بھنور سے ڈوب کے ابھرا تو یہ کھلا مجھ پر

سمندری تھیں ہوائیں میں بادبان زدہ

سب اپنا حرف معانی بنا رہے ہیں شررؔ

یہ لفظ لفظ تو صدیوں سے ہیں زبان زدہ

ana zada tha kahin par kahin par an zada

zamin ki zad se nikalne tak asman zada

yahan pe dasht-o-samundar ki bat mat karna

hamare shahr ka har shakhs hai makan zada

khayal-o-khwab ke mausam badalne wale hain

hujum-e-wahm-o-tasawwur mein hai guman zada

tu bal-o-par ki numaish pe harf a jata

hawa ka rukh na palatta agar uran zada

hamare baad hamen dhundne ke sab raste

hamari khak mein mil jaenge nishan zada

bhanwar se dub ke ubhra to ye khula mujh par

samundari thin hawaen mein badban zada

sab apna harf-e-maani bana rahe hain sharar

ye lafz lafz to sadiyon se hain zaban zada