حقیقت ہے اسے مانیں نہ مانیں گھٹتی بڑھتی ہیں

حقیقت ہے اسے مانیں نہ مانیں گھٹتی بڑھتی ہیں

وہ جھوٹی ہوں کہ سچی داستانیں گھٹتی بڑھتی ہیں

کسی پہلو سے کوئی تیر آ کر چاٹ جائے گا

ہزاروں زاویے ہیں اور کمانیں گھٹتی بڑھتی ہیں

فلک گیری کی خواہش بال و پر کو راکھ کر دے گی

ہوس رانو پرندوں کی اڑانیں گھٹتی بڑھتی ہیں

شکم سیری نے دسترخوان بچھوائے ہیں لوگوں سے

مذاق ذائقہ سمجھو زبانیں گھٹتی بڑھتی ہیں

بلندی اور پستی کا کوئی معیار طے کر لو

زمیں تنگ ہو رہی ہے اور چٹانیں گھٹتی بڑھتی ہیں

میں ان چاندی کے بازاروں پہ اپنے دانت کیا گاڑوں

چمکتی پھیکی پڑتی سب دوکانیں گھٹتی بڑھتی ہیں

شررؔ میں ایسی مٹی پر اساس فن نہیں رکھتا

رسانوں کا بھروسہ کیا رسانیں گھٹتی بڑھتی ہیں

haqiqat hai use manen na manen ghatti barhti hain

wo jhuti hun ke sachchi dastanen ghatti barhti hain

kisi pahlu se koi tir a kar chat jaega

hazaron zawiye hain aur kamanen ghatti barhti hain

falak giri ki khwahish bal-o-par ko rakh kar degi

hawas rano parindon ki uranen ghatti barhti hain

shikam sairi ne dastarkhwan bichhwae hain logon se

mazaq-e-zaiqa samjho zabanen ghatti barhti hain

bulandi aur pasti ka koi meyar tai kar lo

zamin tang ho rahi hai aur chatanen ghatti barhti hain

main un chandi ke bazaron pe apne dant kya garun

chamakti phiki parti sab dukanen ghatti barhti hain

sharar mein aisi mitti par asas-e-fan nahin rakhta

rasanon ka bharosa kya rasanen ghatti barhti hain