آئینہ در آئینہ قد آوری کا کرب ہے

آئینہ در آئینہ قد آوری کا کرب ہے

گمشدہ دانش وری ہے خود سری کا کرب ہے

میرا دکھ یہ ہے کہ میں نا معتبر لشکر میں ہوں

سر بہ نیزہ میں نہیں ہوں اک جری کا کرب ہے

بھوک کو نسبت نہیں گیہوں کی پیداوار سے

میرا دسترخوان خالی طشتری کا کرب ہے

اک طرف یاروں کی یاری کا بھرم کھلتا ہوا

اک طرف اخلاص کی بخیہ گری کا کرب ہے

اپنے دروازے پہ بیٹھا سوچتا رہتا ہوں میں

میرا گھر اجداد کی بارہ دری کا کرب ہے

وہ زمانہ ہے کہ اب تار نفس بھی ہے گراں

بعد کی منزل تو بس خوش پیکری کا کرب ہے

وقت کی میزان پر بینائی خنداں ہے شررؔ

کور بینوں میں بھی اب دیدہ وری کا کرب ہے

aina dar aina qad awari ka karb hai

gumshuda danish wari hai khud siri ka karb hai

mera dukh ye hai ke main na motabar lashkar mein hun

sar ba neza mein nahin hun ik jari ka karb hai

bhuk ko nisbat nahin gehun ki paidawar se

mera dastarkhwan khali tashtari ka karb hai

ik taraf yaron ki yari ka bharam khulta hua

ik taraf ikhlas ki bakhiya giri ka karb hai

apne darwaze pe baitha sochta rahta hun main

mera ghar ajdad ki bara dari ka karb hai

wo zamana hai ke ab tar-e-nafas bhi hai giran

baad ki manzil to bas khush paikari ka karb hai

waqt ki mizan par binai khandan hai sharar

kor bainon mein bhi ab dida wari ka karb hai