پہلے تو جانچتا ہوں تمہاری نظر کو میں

پہلے تو جانچتا ہوں تمہاری نظر کو میں

پھر دیکھتا ہوں غور سے اپنے جگر کو میں

اب دل کا غم اٹھاؤں کہ روؤں جگر کو میں

مشکوک پا رہا ہوں کسی کی نظر کو میں

سن کر نوائے عشق و محبت کی التجا

لو چھیڑتا ہوں آج رباب اثر کو میں

تیری طرح کروں گا گریباں کو چاک چاک

دیتا ہوں یہ پیام طلوع سحر کو میں

جس رہ گزر پہ عشق کے آنسو ڈھلک پڑے

حسرت سے تک رہا ہوں اسی رہ گزر کو میں

رہبر بنا تھا وادئ غربت میں جو کبھی

منزل پہ ڈھونڈھتا ہوں اسی راہبر کو میں

جس سے حصول عیش و مسرت محال ہے

سنتا ہوں فرط یاس سے ایسی خبر کو میں

مانا کہ اپنے دل پہ مجھے اختیار ہے

لیکن دبا کے رکھ نہ سکوں گا نظر کو میں

اے تیر ناز یار توجہ سے کام لے

بے رنگ پا رہا ہوں نقوش جگر کو میں

دل کے علاوہ اور مرے پاس کچھ نہیں

یہ دے کے بھیجتا ہوں وفاؔ نامہ بر کو میں

pahle to janchta hun tumhari nazar ko main

phir dekhta hun ghaur se apne jigar ko main

ab dil ka gham uthaun ke roun jigar ko main

mashkuk pa raha hun kisi ki nazar ko main

sun kar nawa-e-ishq-o-mohabbat ki iltija

lo chherta hun aj rabab-e-asar ko main

teri tarah karunga gareban ko chak chak

deta hun ye payam-e-tulu-e-sahar ko main

jis rah guzar pe ishq ke ansu dhalak pare

hasrat se tak raha hun isi rah guzar ko main

rahbar bana tha wadi-e-ghurbat mein jo kabhi

manzil pe dhundhta hun isi rahbar ko main

jis se husul-e-aish-o-masarrat muhal hai

sunta hun fart-e-yas se aisi khabar ko main

mana ke apne dil pe mujhe ikhtiyar hai

lekin daba ke rakh na sakunga nazar ko main

ai tir-e-naz yar tawajjoh se kam le

be rang pa raha hun nuqush-e-jigar ko main

dil ke alawa aur mire pas kuchh nahin

ye de ke bhejta hun wafa nama bar ko main