یہ دنیا ظاہراً شہ کاری سی معلوم ہوتی ہے

یہ دنیا ظاہراً شہ کاری سی معلوم ہوتی ہے

بہ باطن یہ ہمیں بے کار سی معلوم ہوتی ہے

یہ کیا عالم ہے کیسی دل کی حالت ہے کوئی دیکھے

کہ شاخ گل بھی اب تلوار سی معلوم ہوتی ہے

خدا معلوم کیسا وقت آیا ہے گلستاں پر

پریشاں گل کلی بیمار سی معلوم ہوتی ہے

زمانہ لاکھ دیوانہ سمجھتا ہے مگر ہم کو

زمانے کی نظر بیمار سی معلوم ہوتی ہے

قناعت جس کی فطرت ہو اسے نان جویں تک بھی

ہمیشہ میوۂ قندھار سی معلوم ہوتی ہے

بظاہر ربط ہے اہل جہاں میں لیکن اے ہمدم

دلوں کے درمیاں دیوار سی معلوم ہوتی ہے

جو ہوگا سامنا تو خالق دنیا سے کہہ دیں گے

تری دنیا ہمیں بے کار سی معلوم ہوتی ہے

جفاؤں سے ملا ہے التفات خاص اے لاغرؔ

جفا بھی پیار کا اظہار سی معلوم ہوتی ہے

ye duniya zahiran shah kari si maalum hoti hai

ba batin ye hamen be kar si maalum hoti hai

ye kya alam hai kaisi dil ki halat hai koi dekhe

ke shakh-e-gul bhi ab talwar si maalum hoti hai

khuda maalum kaisa waqt aya hai gulistan par

pareshan gul kali bimar si maalum hoti hai

zamana lakh diwana samajhta hai magar ham ko

zamane ki nazar bimar si maalum hoti hai

qanaat jis ki fitrat ho use nan-e-jawin tak bhi

hamesha mewa-e-qandhar si maalum hoti hai

bazahir rabt hai ahl-e-jahan mein lekin ai hamdam

dilon ke darmiyan diwar si maalum hoti hai

jo hoga samna to khaliq-e-duniya se kah denge

tiri duniya hamen be kar si maalum hoti hai

jafaon se mila hai iltifat-e-khas ai laghar

jafa bhi pyar ka izhar si maalum hoti hai