مصیبت میں کسی کو مبتلا کوئی نہیں کرتا

مصیبت میں کسی کو مبتلا کوئی نہیں کرتا

برے اعمال سے یہ اپنے سر خود لائی جاتی ہے

بہاروں کی تمنا ہی نہیں اے باغباں یعنی

گلوں پر تازگی خون جگر سے لائی جاتی ہے

ضرورت ہے بصیرت آنکھ میں پیدا ہو رادھا سے

چھبی گھنشیام کی تو ہر جگہ ہی پائی جاتی ہے

یہ دستور کہن ہے دوستو رندوں کی محفل کا

دلوں کی بات مشکل سے زباں پر لائی جاتی ہے

اگرچہ ایک سی روداد ہے فرہاد و مجنوں کی

مگر یہ مختلف انداز سے دہرائی جاتی ہے

یہ دنیا ہم کو اب تک راس آئی ہے نہ آئے گی

یہ مانا دل کشی اس میں بھی کچھ کچھ پائی جاتی ہے

بشر کی عزت و عظمت زر و گوہر سے کیا ہوگی

یہ دولت وضع داری ہی میں لاغرؔ پائی جاتی ہے

musibat mein kisi ko mubtala koi nahin karta

bure aamal se ye apne sar khud lai jati hai

baharon ki tamanna hi nahin ai baghban yaani

gulon par tazgi khun-e-jigar se lai jati hai

zarurat hai basirat ankh mein paida ho radha se

chhabbi ghanshayam ki to har jagah hi pai jati hai

ye dastur-e-kuhan hai dosto rindon ki mahfil ka

dilon ki bat mushkil se zaban par lai jati hai

agarche ek si rudad hai farhad-o-majnun ki

magar ye mukhtalif andaz se dohrai jati hai

ye duniya ham ko ab tak ras ai hai na aegi

ye mana dil kashi is mein bhi kuchh kuchh pai jati hai

bashar ki izzat-o-azmat zar-o-gauhar se kya hogi

ye daulat waza dari hi mein laghar pai jati hai