حقیقت کو عجب انداز سے جھٹلایا جاتا ہے

حقیقت کو عجب انداز سے جھٹلایا جاتا ہے

زمانے کو خدا کے نام پر بہکایا جاتا ہے

تعلق رہنما کا مفلس و نادار سے کیسا

انہیں ووٹوں کی خاطر وقت پر پھسلایا جاتا ہے

کہیں میری شرافت کو نہ کمزوری سمجھ بیٹھے

کبھی دشمن کو بھی اس واسطے دھمکایا جاتا ہے

اگرچہ ہر نئے دن کا نیا انداز ہے لیکن

کبھی افسانۂ پارینہ بھی دہرایا جاتا ہے

اگر جذبات زخمی ہوں تو ہوگا فکر بھی زخمی

یہی تاریخ کے اوراق میں بھی پایا جاتا ہے

یہ رتبہ ہر کسی کو کوئے جاناں میں نہیں ملتا

کوئی منصور ہو تو دار پر لٹکایا جاتا ہے

haqiqat ko ajab andaz se jhutlaya jata hai

zamane ko khuda ke nam par bahkaya jata hai

taalluq rahnuma ka muflis-o-nadar se kaisa

unhen woton ki khatir waqt par phuslaya jata hai

kahin meri sharafat ko na kamzori samajh baithe

kabhi dushman ko bhi is waste dhamkaya jata hai

agarche har nae din ka naya andaz hai lekin

kabhi afsana-e-parina bhi dohraya jata hai

agar jazbat zakhmi hun to hoga fikr bhi zakhmi

yahi tarikh ke auraq mein bhi paya jata hai

ye rutba har kisi ko ku-e-janan mein nahin milta

koi mansur ho to dar par latkaya jata hai