یہ ہر اک شخص کے اپنے تصور اور گماں تک ہے

یہ ہر اک شخص کے اپنے تصور اور گماں تک ہے

کسے معلوم ہے ورنہ حد عرفاں کہاں تک ہے

ہمیں تو دیکھنا ہے ہمت و جرأت کہاں تک ہے

ہماری زندگی ورنہ فقط ضبط فغاں تک ہے

جنون عشق میں آہ و فغاں شکوہ گلہ کیسا

اگر ہے بھی تو وہ آخر ہمارے مہرباں تک ہے

جنوں کی وسعتوں کا کوئی اندازہ نہ کر پایا

رسائی عقل انساں کی فقط سود و زیاں تک ہے

قدم چلنے سے قاصر ہیں اندھیری رات ہے سر پر

بتا دے کاش یہ کوئی مجھے چلنا کہاں تک ہے

کسی بھی آستاں پر اب خودی جانے نہیں دیتی

ہماری التجا تو مالک کون و مکاں تک ہے

ہمیشہ اہل دل ہی وقت کے دھارے بدلتے ہیں

جو بزدل ہیں رسائی ان کی بس آہ و فغاں تک ہے

پس مردن کوئی بھی نام تک ان کا نہیں لیتا

جو سمجھے تھے ہمارا تذکرہ رہتے جہاں تک ہے

بہار گلستاں تو ہے خدا کے ہاتھ اے لاغرؔ

بس اک فرض نگہبانی نگاہ باغباں تک ہے

ye har ik shakhs ke apne tasawwur aur guman tak hai

kise maalum hai warna had-e-irfan kahan tak hai

hamen to dekhna hai himmat-o-jurat kahan tak hai

hamari zindagi warna faqat zabt-e-fughan tak hai

junun-e-ishq mein ah-o-fughan shikwa gila kaisa

agar hai bhi to wo akhir hamare mehrban tak hai

junun ki wusaton ka koi andaza na kar paya

rasai aql insan ki faqat sud-o-ziyan tak hai

qadam chalne se qasir hain andheri rat hai sar par

bata de kash ye koi mujhe chalna kahan tak hai

kisi bhi astan par ab khudi jane nahin deti

hamari iltija to malik kaun-o-makan tak hai

hamesha ahl-e-dil hi waqt ke dhare badalte hain

jo buzdil hain rasai un ki bas ah-o-fughan tak hai

pas murdan koi bhi nam tak un ka nahin leta

jo samjhe the hamara tazkira rahte jahan tak hai

bahar-e-gulsitan to hai khuda ke hath ai laghar

bas ik farz nigahbani nigah-e-baghban tak hai