کہیں ساون میں بادل جھوم کر آیا نہیں اب تک

کہیں ساون میں بادل جھوم کر آیا نہیں اب تک

کسی نے گیت بھی ملہار کا گایا نہیں اب تک

اسے احساس آزادی اگر ہو بھی تو کیوں کر ہو

رہا ہو کر جو قیدی قید سے آیا نہیں اب تک

اسیری پر کسی بے بس کی ہے صیاد ابھی نازاں

خدا کا خوف اس کے دل میں کیوں آیا نہیں اب تک

زمانہ ساز ہونے کی ضرورت تھی زمانے میں

زمانہ ساز ہونا ہی ہمیں آیا نہیں اب تک

شب فرقت ہمارا ہچکیوں سے دم نکل جاتا

خدا کا شکر تم نے یاد فرمایا نہیں اب تک

یقیناً مرشد کامل کی شفقت کا نتیجہ ہے

ہوس کے جال میں لاغرؔ کبھی آیا نہیں اب تک

kahin sawan mein badal jhum kar aya nahin ab tak

kisi ne git bhi malhar ka gaya nahin ab tak

use ehsas-e-azadi agar ho bhi to kyun kar ho

raha ho kar jo qaidi qaid se aya nahin ab tak

asiri par kisi be bas ki hai sayyad abhi nazan

khuda ka khauf us ke dil mein kyun aya nahin ab tak

zamana saz hone ki zarurat thi zamane mein

zamana saz hona hi hamen aya nahin ab tak

shab-e-furqat hamara hichkiyon se dam nikal jata

khuda ka shukr tum ne yad farmaya nahin ab tak

yaqinan murshid-e-kamil ki shafqat ka natija hai

hawas ke jal mein laghar kabhi aya nahin ab tak