ہنسی گلوں میں ستاروں میں روشنی نہ ملی

ہنسی گلوں میں ستاروں میں روشنی نہ ملی

ملے نہ تم تو کہیں بھی ہمیں خوشی نہ ملی

نہ چاند میں نہ شفق میں نہ لالہ و گل میں

جو آپ میں ہے کہیں بھی وہ دل کشی نہ ملی

نگاہ لطف کی ہے منتظر مری شب غم

ستارے ڈوب چلے اور روشنی نہ ملی

ہمیں کو سونپ دیے کل جہاں کے رنج و الم

کسی میں اور ہماری سی دل دہی نہ ملی

نگاہ دوست نے بخشی جو دل کو مدہوشی

شراب و جام سے ہم کو وہ بے خودی نہ ملی

ہر اک نشاط میں پنہاں ملا نشاط کا غم

جو عیش سے ہو بسر ایسی زندگی نہ ملی

مرے خیال میں ہیں یہ تجلیاں کس کی

اندھیری رات میں بھی مجھ کو تیرگی نہ ملی

وہی فضا وہی گلشن وہی ہوا ہے مگر

ملی جو گل کو وہ خاروں کو زندگی نہ ملی

گلہ کریں گے نہ اب میرے بعد کے رہرو

کہ ان کو راہ محبت میں روشنی نہ ملی

ہزار بار ہوا خون آرزو لیکن

کبھی کسی کو مری آنکھ میں نمی نہ ملی

جو چھیڑتی مرے بیتاب دل کے تاروں کو

کسی بھی ساز میں درشن وہ نغمگی نہ ملی

hansi gulon mein sitaron mein raushni na mili

mile na tum to kahin bhi hamen khushi na mili

na chand mein na shafaq mein na lala-o-gul mein

jo ap mein hai kahin bhi wo dil kashi na mili

nigah-e-lutf ki hai muntazir miri shab-e-gham

sitare dub chale aur raushni na mili

hamen ko saunp diye kal jahan ke ranj-o-alam

kisi mein aur hamari si dil dahi na mili

nigah-e-dost ne bakhshi jo dil ko madhoshi

sharab-o-jam se ham ko wo be khudi na mili

har ik nishat mein pinhan mila nishat ka gham

jo aish se ho basar aisi zindagi na mili

mire khayal mein hain ye tajalliyan kis ki

andheri rat mein bhi mujh ko tirgi na mili

wahi faza wahi gulshan wahi hua hai magar

mili jo gul ko wo kharon ko zindagi na mili

gila karenge na ab mere baad ke rahrau

ke un ko rah-e-mohabbat mein raushni na mili

hazar bar hua khun-e-arzu lekin

kabhi kisi ko miri ankh mein nami na mili

jo chherti mire betab dil ke taron ko

kisi bhi saz mein darshan wo naghmagi na mili