با وقار لہجے میں پر اثر کہا جائے

با وقار لہجے میں پر اثر کہا جائے

دل کا حال کچھ بھی ہو مختصر کہا جائے

وسعت تخیل کو بال و پر کہا جائے

شوق کی بلندی کو بام و در کہا جائے

کیوں نہ ہم بدل ڈالیں کہنہ اصطلاحوں کو

کیوں نہ آج قاتل کو چارہ گر کہا جائے

زندگی کی راہوں میں کون ساتھ دیتا ہے

کس کو اس مسافت میں ہم سفر کہا جائے

جس طرف سے وہ گزریں بس وہ رہ گزر ٹھہرے

عام راستے کو کیوں رہ گزر کہا جائے

چاہے جس طرح کہئے ختم ہو نہیں سکتا

عشق وہ فسانہ ہے عمر بھر کہا جائے

وہ چمن ہو یا صحرا دونوں ایک جیسے ہیں

اک عجیب الجھن ہے کس کو گھر کہا جائے

دل کی روشنی کو لوگ کیوں سحر نہیں کہتے

وقت کے اجالے کو کیوں سحر کہا جائے

گمرہی کی منزل میں کس کو آج اے جوہرؔ

راہزن کہا جائے راہبر کہا جائے

ba waqar lahje mein pur asar kaha jae

dil ka hal kuchh bhi ho mukhtasar kaha jae

wusat-e-takhayyul ko bal-o-par kaha jae

shauq ki bulandi ko bam-o-dar kaha jae

kyun na ham badal dalen kohna istlahon ko

kyun na aj qatil ko chara gar kaha jae

zindagi ki rahon mein kaun sath deta hai

kis ko is masafat mein ham safar kaha jae

jis taraf se wo guzren bas wo rah guzar thahre

am raste ko kyun rah guzar kaha jae

chahe jis tarah kahiye khatm ho nahin sakta

ishq wo fasana hai umr bhar kaha jae

wo chaman ho ya sahra donon ek jaise hain

ik ajib uljhan hai kis ko ghar kaha jae

dil ki raushni ko log kyun sahar nahin kahte

waqt ke ujale ko kyun sahar kaha jae

gumrahi ki manzil mein kis ko aj ai jauhar

rahzan kaha jae rahbar kaha jae