میں تیرگی سے گزرتا ہوں روشنی کی طرح

میں تیرگی سے گزرتا ہوں روشنی کی طرح

مجھے شعور ہے جینے کا آدمی کی طرح

یہی ادا تھی یہی ناز تھا یہی شوخی

اک اور شخص بھی دیکھا تھا آپ ہی کی طرح

میں ان سے محو تکلم وہ مجھ سے گرم سخن

میں زندگی سے مخاطب ہوں زندگی کی طرح

خطا معاف یہ ملنا بھی کوئی ملنا ہے

تم اپنے ہو کے بھی ملتے ہو اجنبی کی طرح

ترا جمال ہے آئینہ دار ذات و صفات

ترا خیال ہے سورج کی روشنی کی طرح

کسی کی یاد کی خوشبو ہے مثل بوئے چمن

کسی کی زلف کا سایہ ہے چاندنی کی طرح

مری حیات مری کائنات کے مالک

میں چاہتا ہوں تجھے اپنی زندگی کی طرح

بدن مہک اٹھے خوشبوئے یار سے جوہرؔ

اگر حیات ہو پھولوں کی تازگی کی طرح

main tirgi se guzarta hun raushni ki tarah

mujhe shuur hai jine ka admi ki tarah

yahi ada thi yahi naz tha yahi shokhi

ik aur shakhs bhi dekha tha ap hi ki tarah

main un se mahw-e-takallum wo mujh se garm-e-sukhan

main zindagi se mukhatib hun zindagi ki tarah

khata muaf ye milna bhi koi milna hai

tum apne ho ke bhi milte ho ajnabi ki tarah

tira jamal hai aina dar zat-o-sifat

tira khayal hai suraj ki raushni ki tarah

kisi ki yad ki khushbu hai misl-e-bu-e-chaman

kisi ki zulf ka saya hai chandni ki tarah

miri hayat miri kainat ke malik

main chahta hun tujhe apni zindagi ki tarah

badan mahak uthe khushbu-e-yar se jauhar

agar hayat ho phulon ki tazgi ki tarah