سونی سونی سی ہے ہر بزم سخن تیرے بعد

سونی سونی سی ہے ہر بزم سخن تیرے بعد

ختم ہے سلسلۂ عظمت فن تیرے بعد

اپنے افکار سے اردو کو نوازا تو نے

کس کو اردو سے ہے اب اتنی لگن تیرے بعد

کبھی غالبؔ تو کبھی میرؔ کے انداز میں شعر

ہے میسر کسے یہ طرز سخن تیرے بعد

بحر تخئیل میں اگلی سی روانی وہ کہاں

موجزن اب بھی ہیں گو گنگ و جمن تیرے بعد

محفل شعر و ادب میں وہ کہاں جوش و خروش

سرد ہے گرمیٔ بازار سخن تیرے بعد

کس سے پائیں گے سوالوں کا سکوں بخش جواب

دل کو محسوس سی ہوتی ہے گھٹن تیرے بعد

کوئی سلجھا نہ سکا زلف ادب بعد ترے

پڑ گئی گیسوئے اردو میں شکن تیرے بعد

تیرا ہر شعر نیا تیرا ہر اسلوب جدید

کون توڑے گا روایات کہن تیرے بعد

علم و فن میں ترا ثانی کوئی موجود نہیں

ناز کس پر کریں اب اہل وطن تیرے بعد

جان دینے کے لئے اپنی بہ نام اردو

کون پہنچے گا سر دار و رسن تیرے بعد

کون رکھے گا یہاں میکدۂ شعر کی لاج

دیکھنا ہے ہمیں رندوں کا چلن تیرے بعد

کیا گزرتی ہے خبر ہے تجھے اے روح فراقؔ

دل جوہرؔ پہ سر بزم سخن تیرے بعد

suni suni si hai har bazm-e-sukhan tere baad

khatm hai silsila-e-azmat fan tere baad

apne afkar se urdu ko nawaza tu ne

kis ko urdu se hai ab itni lagan tere baad

kabhi ghalib to kabhi mir ke andaz mein sher

hai muyassar kise ye tarz-e-sukhan tere baad

bahr-e-takhil mein agli si rawani wo kahan

maujzan ab bhi hain go gang-o-jaman tere baad

mahfil-e-sher-o-adab mein wo kahan josh-o-kharosh

sard hai garmi-e-bazar-e-sukhan tere baad

kis se paenge sawalon ka sakun bakhsh jawab

dil ko mahsus si hoti hai ghutan tere baad

koi suljha na saka zulf-e-adab baad tire

par gai gesu-e-urdu mein shikan tere baad

tera har sher naya tera har uslub-e-jadid

kaun torega riwayat-e-kuhan tere baad

ilm-o-fan mein tira sani koi maujud nahin

naz kis par karen ab ahl-e-watan tere baad

jan dene ke liye apni ba nam-e-urdu

kaun pahunchega sar-e-dar-o-rasan tere baad

kaun rakhega yahan maikada-e-sher ki laj

dekhna hai hamen rindon ka chalan tere baad

kya guzarti hai khabar hai tujhe ai ruh firaq

dil-e-jauhar pe sar-e-bazm-e-sukhan tere baad