رسن و دار سے یا کوئے بتاں سے اٹھے

رسن و دار سے یا کوئے بتاں سے اٹھے

فتنہ ہر حال میں فتنہ ہے جہاں سے اٹھے

کتنے جاں سوز و دل آویز ہیں وہ نغمے بھی

شعلہ بن کر جو مرے حسن بیاں سے اٹھے

دونوں عالم میں کہیں ان کو ٹھکانا نہ ملا

جو تری بزم سے اٹھے وہ جہاں سے اٹھے

ہائے وہ نالے کہ جو عرش بریں تک پہنچے

اف وہ طوفاں جو مرے اشک رواں سے اٹھے

کشش حسن نے اک گام بھی چلنے نہ دیا

پھر وہیں بیٹھ گئے لوگ جہاں سے اٹھے

کام کچھ کر نہ سکا واعظ ناداں کا طلسم

کتنے طوفاں مری خاموش فغاں سے اٹھے

ان حجابات کی عظمت کو کہوں کیا جوہرؔ

جو یقیں بن کے مرے وہم و گماں سے اٹھے

rasan-o-dar se ya ku-e-butan se uthe

fitna har hal mein fitna hai jahan se uthe

kitne jan soz-o-dil awez hain wo naghme bhi

shola ban kar jo mire husn-e-bayan se uthe

donon alam mein kahin un ko thikana na mila

jo tiri bazm se uthe wo jahan se uthe

hae wo nale ke jo arsh-e-barin tak pahunche

uf wo tufan jo mire ashk-e-rawan se uthe

kashish-e-husn ne ik gam bhi chalne na diya

phir wahin baith gae log jahan se uthe

kam kuchh kar na saka waiz-e-nadan ka tilism

kitne tufan miri khamosh fughan se uthe

un hijabat ki azmat ko kahun kya jauhar

jo yaqin ban ke mire wahm-o-guman se uthe