ہوئی جب شمع روشن بزم میں پروانے جاگ اٹھے

ہوئی جب شمع روشن بزم میں پروانے جاگ اٹھے

جنوں نے اس طرح انگڑائی لی دیوانے جاگ اٹھے

بہ فیض چشم ساقی بزم میں پیمانے جاگ اٹھے

ادھر گردش میں جام آئے ادھر میخانے جاگ اٹھے

یہ کس جان بہاراں نے بہ انداز کرم دیکھا

مقدر کھل گئے صحراؤں کے ویرانے جاگ اٹھے

خدا معلوم کیا تاثیر تھی رندوں کی آمد میں

قدم رکھا ادھر اور اس طرف میخانے جاگ اٹھے

کسی کو تو نوائے درد سن کر جاگنا ہی تھا

اگر اپنے نہیں جاگے تو کیا بیگانے جاگ اٹھے

موذن کی صدائے دلنشیں کا یہ اثر دیکھا

حرم والوں کی آنکھیں کھل گئیں بت خانے جاگ اٹھے

یہ کس نے ذکر چھیڑا اس سراپا ناز کا جوہرؔ

کہ حسن و عشق کے سوئے ہوئے افسانے جاگ اٹھے

hui jab sham-e-raushan bazm mein parwane jag uthe

junun ne is tarah angrai li diwane jag uthe

ba faiz-e-chashm-e-saqi bazm mein paimane jag uthe

idhar gardish mein jam ae idhar maikhane jag uthe

ye kis jan-e-baharan ne ba andaz-e-karam dekha

muqaddar khul gae sahraon ke wirane jag uthe

khuda maalum kya tasir thi rindon ki amad mein

qadam rakha idhar aur is taraf maikhane jag uthe

kisi ko to nawa-e-dard sun kar jagna hi tha

agar apne nahin jage to kya begane jag uthe

muazzin ki sada-e-dilnashin ka ye asar dekha

haram walon ki ankhen khul gain but khane jag uthe

ye kis ne zikr chhera is sarapa naz ka jauhar

ke husn-o-ishq ke soe hue afsane jag uthe