ہے کھیل جاری ازل سے یہ اوج و پستی کا

ہے کھیل جاری ازل سے یہ اوج و پستی کا

عروج جس کا کبھی تھا زوال ہے اس کا

بنائی اس کے تصور میں ہے نئی تصویر

ہے شاہکار مرا پر خیال ہے اس کا

کہا تھا اس نے نہ جی پائے گا مجھے کھو کر

وہ جی رہا ہے تو یہ بھی کمال ہے اس کا

خمار اس کی محبت کا یوں وجود میں ہے

کہ عکس میں مرے شامل جمال ہے اس کا

جواب دے دیا اس نے سوال کا میرے

مگر جواب میں پھر اک سوال ہے اس کا

کچھ اس طرح سے وہ شعروں پہ داد دیتا ہے

کہ گویا ذوق سخن بے مثال ہے اس کا

‎صبیحہؔ یوسف ثانی تو وہ نہیں لیکن

مری نظر میں سمایا جمال ہے اس کا

hai khel jari azal se ye auj-o-pasti ka

uruj jis ka kabhi tha zawal hai us ka

banai us ke tasawwur mein hai nai taswir

hai shahkar mira par khayal hai us ka

kaha tha us ne na ji paega mujhe kho kar

wo ji raha hai to ye bhi kamal hai us ka

khumar us ki mohabbat ka yun wajud mein hai

ke aks mein mire shamil jamal hai us ka

jawab de diya us ne sawal ka mere

magar jawab mein phir ik sawal hai us ka

kuchh is tarah se wo sheron pe dad deta hai

ke goya zauq-e-sukhan be misal hai us ka

sabeha yusuf-e-sani to wo nahin lekin

miri nazar mein samaya jamal hai us ka