خود کو اہل وفا سمجھتے ہیں

خود کو اہل وفا سمجھتے ہیں

اوروں کو بے وفا سمجھتے ہیں

پار کشتی لگا کے دکھلائیں

خود کو گر ناخدا سمجھتے ہیں

خامیاں دوسروں کی گنوائیں

خود کو جو پارسا سمجھتے ہیں

کہہ بھی ڈالیں زبان سے اپنی

جو برا یا بھلا سمجھتے ہیں

اک نئی زندگی ہے بعد از مرگ

لوگ اسے انتہا سمجھتے ہیں

حرص و طمع کی دوڑ جاری ہے

سب اسی میں بقا سمجھتے ہیں

کس طرح جان لوں صبیحہؔ کو

اپنے دل میں وہ کیا سمجھتے ہیں

khud ko ahl-e-wafa samajhte hain

auron ko be wafa samajhte hain

par kashti laga ke dikhlaen

khud ko gar nakhuda samajhte hain

khamiyan dusron ki ganwaen

khud ko jo parsa samajhte hain

kah bhi dalen zaban se apni

jo bura ya bhala samajhte hain

ik nai zindagi hai baad az marg

log use intiha samajhte hain

hirs-o-tamaa ki daur jari hai

sab isi mein baqa samajhte hain

kis tarah jan lun sabeha ko

apne dil mein wo kya samajhte hain