کہیں جمال ازل ہم کو رونما نہ ملا

کہیں جمال ازل ہم کو رونما نہ ملا

ملے تو حسن مگر حسن آپ سا نہ ملا

رہی تلاش مگر درد آشنا نہ ملا

ہمارے بعد انہیں ہم سا با وفا نہ ملا

گئے ہیں دیر و حرم میں بھی بارہا لیکن

وہ آسرا جو دیا تو نے ساقیا نہ ملا

جو دور تھے تو بہت پارسا تھے یہ زاہد

جو پاس آئے تو کوئی بھی پارسا نہ ملا

مقابلے کی جو طاقت تھی وہ ابھر تو سکی

خدا کا شکر ہے کشتی کو ناخدا نہ ملا

جواب جنت رنگیں سہی تری دنیا

مگر ہمیں تو یہاں لطف اے خدا نہ ملا

ہوا و حرص کے لاکھوں شکار پائے مگر

کوئی بھی درد محبت میں مبتلا نہ ملا

جو چشم مست سے چھلکا کے دے الست کی مے

ترے سوا کوئی دنیا میں ساقیا نہ ملا

مجھی کو بخش دئے کل جہان کے آلام

غم جہاں کے لئے کوئی دوسرا نہ ملا

کہوں تو کس سے کہوں دل کی بات اے درشنؔ

سنے جو درد بشر ایسا ہم نوا نہ ملا

kahin jamal-e-azal ham ko runuma na mila

mile to husn magar husn ap sa na mila

rahi talash magar dard ashna na mila

hamare baad unhen ham sa ba wafa na mila

gae hain dair-o-haram mein bhi barha lekin

wo asra jo diya tu ne saqiya na mila

jo dur the to bahut parsa the ye zahid

jo pas ae to koi bhi parsa na mila

muqable ki jo taqat thi wo ubhar to saki

khuda ka shukr hai kashti ko nakhuda na mila

jawab-e-jannat rangin sahi tiri duniya

magar hamen to yahan lutf ai khuda na mila

hawa-o-hirs ke lakhon shikar pae magar

koi bhi dard-e-mohabbat mein mubtala na mila

jo chashm-e-mast se chhalka ke de alast ki mai

tire siwa koi duniya mein saqiya na mila

mujhi ko bakhsh diye kal jahan ke alam

gham jahan ke liye koi dusra na mila

kahun to kis se kahun dil ki bat ai darshan

sune jo dard bashar aisa ham nawa na mila