جھیل میں اس کا پیکر دیکھا جیسے شعلہ پانی میں

جھیل میں اس کا پیکر دیکھا جیسے شعلہ پانی میں

زلف کی لہریں پیچاں جیسے ناگ ہو لپکا پانی میں

چاندنی شب میں اس کے پیچھے جب میں اترا پانی میں

چاندی اور سیماب لگا تھا پگھلا پگھلا پانی میں

کتنے رنگ کی مچھلیاں آئیں للچاتی اور بل کھاتی

قطرہ قطرہ میری رگوں سے خون جو ٹپکا پانی میں

روشن روشن رنگ نرالے کیسے نادر کتنے حباب

قلزم ہستی رقص میں تھا یا ایک تماشا پانی میں

ایک قلندر ڈھونڈ رہا تھا چاند ستاروں میں جا کر

اس کا خدا تو پوشیدہ تھا عنقا جیسا پانی میں

مجھ کو یہ محسوس ہوا تھا اپنے عہد کا خضر ہوں میں

چپکے چپکے جب بھی میں نے خضر کو ڈھونڈا پانی میں

آلائش داغوں سے بھرا یہ تیرا بدن اک روز ظفرؔ

رحمت کی گھٹا جب برسی تھی تو صاف ہوا تھا پانی میں

jhil mein us ka paikar dekha jaise shola pani mein

zulf ki lahren pechan jaise nag ho lapka pani mein

chandni shab mein us ke pichhe jab main utra pani mein

chandi aur simab laga tha pighla pighla pani mein

kitne rang ki machhliyan aen lalchati aur bal khati

qatra qatra meri ragon se khun jo tapka pani mein

raushan raushan rang nirale kaise nadir kitne habab

qulzum hasti raqs mein tha ya ek tamasha pani mein

ek qalandar dhund raha tha chand sitaron mein ja kar

us ka khuda to poshida tha anqa jaisa pani mein

mujh ko ye mahsus hua tha apne ahd ka khizr hun main

chupke chupke jab bhi main ne khizar ko dhunda pani mein

alaish daghon se bhara ye tera badan ik roz zafar

rahmat ki ghata jab barsi thi to saf hua tha pani mein