میرے نازک سوال میں اترو

میرے نازک سوال میں اترو

ایک حرف جمال میں اترو

نقش بندی مجھے بھی آتی ہے

کوئی صورت خیال میں اترو

پھینک دو دور آج سورج کو

خود ہی اب ماہ و سال میں اترو

خوب چمکو گی آؤ شمشیرو

میرے زخموں کے جال میں اترو

کچھ تو لطف تضاد آئے گا

میرے غار زوال میں اترو

خواہ پت جھڑ کی ہی ہوا بن کر

پیڑ کی ڈال ڈال میں اترو

مضمحل رات اور تنہائی

کاش خواب وصال میں اترو

اے ظفرؔ پیش ہے مہابھارت

آدمیت کی ڈھال میں اترو

mere nazuk sawal mein utro

ek harf-e-jamal mein utro

naqsh bandi mujhe bhi ati hai

koi surat khayal mein utro

phenk do dur aj suraj ko

khud hi ab mah-o-sal mein utro

khub chamkogi ao shamshiro

mere zakhmon ke jal mein utro

kuchh to lutf-e-tazad aega

mere ghar-e-zawal mein utro

khwah pat jhar ki hi hua ban kar

per ki dal dal mein utro

muzmahil rat aur tanhai

kash khwab-e-wisal mein utro

ai zafar pesh hai mehabharat

admiyyat ki dhal mein utro