کیوں میں حائل ہو جاتا ہوں اپنی ہی تنہائی میں

کیوں میں حائل ہو جاتا ہوں اپنی ہی تنہائی میں

ورنہ اک پر لطف سماں ہے خود اپنی گہرائی میں

فطرت نے عطا کی ہے بے شک مجھ کو بھی کچھ عقل سلیم

کون خلل انداز ہوا ہے میری ہر دانائی میں

جھوٹ کی نمکینی سے باتوں میں آ جاتا ہے مزا

کوئی نہیں لیتا دلچسپی پھیکی سی سچائی میں

اپنے تھے بیگانے تھے اور آخر میں خود میری ذات

کس کس کا اکرام ہوا ہے کتنا مری رسوائی میں

بدلے بدلے لگتے ہو ہے چہرے پر انجانا پن

یا وقت کے ہاتھوں فرق آیا میری ہی بینائی میں

سننے والوں کے چہروں پر سرخ لکیروں کے ہیں نشاں

خونی سوچوں کی آمیزش ہے نغموں کی شہنائی میں

سب قدریں پامال ہوئیں انساں نے خود کو مسخ کیا

قدرت نے کتنی محنت کی تھی اپنی بزم آرائی میں

اپنی آگاہی کی ان کو ہوتی نہیں توفیق کبھی

لوگ خدا کو ڈھونڈ رہے ہیں آفاقی پہنائی میں

دنیا کی دانش گاہوں میں آج عجب اک بحث چھڑی

کون بھروسے کے قابل ہے عاقل اور سودائی میں

جانے کس کردار کی کائی میرے گھر میں آ پہنچی

اب تو ظفرؔ چلنا ہے مشکل آنگن کی چکنائی میں

kyun main hail ho jata hun apni hi tanhai mein

warna ik pur lutf saman hai khud apni gahrai mein

fitrat ne ata ki hai be shak mujh ko bhi kuchh aql-e-salim

kaun khalal andaz hua hai meri har danai mein

jhut ki namakini se baton mein a jata hai maza

koi nahin leta dilchaspi phiki si sachchai mein

apne the begane the aur akhir mein khud meri zat

kis kis ka ikram hua hai kitna miri ruswai mein

badle badle lagte ho hai chehre par anjana pan

ya waqt ke hathon farq aya meri hi binai mein

sunne walon ke chehron par surkh lakiron ke hain nishan

khuni sochon ki amezish hai naghmon ki shahnai mein

sab qadren pamal huin insan ne khud ko maskh kiya

qudrat ne kitni mehnat ki thi apni bazm arai mein

apni agahi ki un ko hoti nahin taufiq kabhi

log khuda ko dhund rahe hain afaqi pahnai mein

duniya ki danish gahon mein aj ajab ik bahs chhiri

kaun bharose ke qabil hai aqil aur saudai mein

jane kis kirdar ki kai mere ghar mein a pahunchi

ab to zafar chalna hai mushkil angan ki chiknai mein