اپنے دل مضطر کو بیتاب ہی رہنے دو

اپنے دل مضطر کو بیتاب ہی رہنے دو

چلتے رہو منزل کو نایاب ہی رہنے دو

تحفے میں انوکھا زخم حالات نے بخشا ہے

احساس کا خوں دے کر شاداب ہی رہنے دو

وہ ہاتھ میں آتا ہے اور ہاتھ نہیں آتا

سیماب صفت پیکر سیماب ہی رہنے دو

گہرائی میں خطروں کا امکاں تو زیادہ ہے

دریائے تعلق کو پایاب ہی رہنے دو

یہ مجھ پہ کرم ہوگا حصے میں مرے اے دوست

اخلاص و مروت کے آداب ہی رہنے دو

ابہام کا پردہ ہے تشکیک کا ہے عالم

تم ذوق تجسس کو بیتاب ہی رہنے دو

مت جاؤ قریب اس کے تم ایک گہن بن کر

آنگن میں اسے اپنا مہتاب ہی رہنے دو

جب تک وہ نہیں آتا اک خواب حسیں ہو کر

تم اپنے شبستاں کو بے خواب ہی رہنے دو

وہ برف کا تودہ یا پتھر نہیں بن جائے

ہر قطرۂ اشک غم سیلاب ہی رہنے دو

وہ بحر فنا میں خود ڈوبا ہے تو اچھا ہے

فی الحال ظفرؔ اس کو غرقاب ہی رہنے دو

apne dil-e-muztar ko betab hi rahne do

chalte raho manzil ko nayab hi rahne do

tohfe mein anokha zakhm-e-halat ne bakhsha hai

ehsas ka khun de kar shadab hi rahne do

wo hath mein ata hai aur hath nahin ata

simab sifat paikar-e-simab hi rahne do

gahrai mein khatron ka imkan to ziyada hai

dariya-e-taalluq ko payab hi rahne do

ye mujh pe karam hoga hisse mein mire ai dost

ikhlas-o-murawwat ke adab hi rahne do

ibham ka parda hai tashkik ka hai alam

tum zauq-e-tajassus ko betab hi rahne do

mat jao qarib us ke tum ek gahan ban kar

angan mein use apna mahtab hi rahne do

jab tak wo nahin ata ik khwab-e-hasin ho kar

tum apne shabistan ko be khwab hi rahne do

wo barf ka tauda ya patthar nahin ban jae

har qatra-e-ashk-e-gham sailab hi rahne do

wo bahr-e-fana mein khud duba hai to achchha hai

filhal zafar us ko gharqab hi rahne do