میں زندگی کا نقشہ ترتیب دے رہا ہوں

میں زندگی کا نقشہ ترتیب دے رہا ہوں

پھر اک جدید خاکہ ترتیب دے رہا ہوں

ہر ساز کا ترنم یکسانیت نما ہے

اک تازہ کار نغمہ ترتیب دے رہا ہوں

جس میں تری تجلی خود آ کے جا گزیں ہو

دل میں اک ایسا گوشہ ترتیب دے رہا ہوں

لمحوں کے سلسلے میں جیتا رہا ہوں لیکن

میں اپنا خاص لمحہ ترتیب دے رہا ہوں

کتنے عجیب قصے لکھے گئے ابھی تک

میں بھی انوکھا قصہ ترتیب دے رہا ہوں

ذروں کا ہے یہ طوفاں بے چہرگی بداماں

ذروں سے ایک چہرہ ترتیب دے رہا ہوں

دنیا کے سارے رشتے بے معنی لگ رہے ہیں

خالق سے اپنا رشتہ ترتیب دے رہا ہوں

پر پیچ راستوں پر چلتا ہوا ظفرؔ میں

سیدھا سا ایک رستہ ترتیب دے رہا ہوں

main zindagi ka naqsha tartib de raha hun

phir ik jadid khaka tartib de raha hun

har saz ka tarannum yaksaniyyat numa hai

ik taza kar naghma tartib de raha hun

jis mein tiri tajalli khud a ke ja guzin ho

dil mein ik aisa gosha tartib de raha hun

lamhon ke silsile mein jita raha hun lekin

main apna khas lamha tartib de raha hun

kitne ajib qisse likhe gae abhi tak

main bhi anokha qissa tartib de raha hun

zarron ka hai ye tufan be chehragi badaman

zarron se ek chehra tartib de raha hun

duniya ke sare rishte be maani lag rahe hain

khaliq se apna rishta tartib de raha hun

pur pech raston par chalta hua zafar mein

sidha sa ek rasta tartib de raha hun