وحشت صدائے دشت ہے وحشت قبائے دشت

وحشت صدائے دشت ہے وحشت قبائے دشت

مجھ پر کسی کی یاد نے کیا کیا بنائے دشت

مجھ پر کسی کا ہجر مسلسل نہ کیجیو

یا رب ذوالجلال مرے اے خدائے دشت

مجنوں کو دیکھ میرے دوارے پہ آ گیا

کاسہ اٹھا کے کہتا ہے وحشت برائے دشت

جیسے کسی کی سانس اکھڑتی ہوئی لگے

جیسے کسی کو راس نہ آئے ہوائے دشت

تجھ پر جو نیند خواب کا دہرا عذاب ہے

تو کیوں نہ تجھ پہ پھونک دوں پڑھ کر دعائے دشت

wahshat sada-e-dasht hai wahshat qaba-e-dasht

mujh par kisi ki yad ne kya kya banae dasht

mujh par kisi ka hijr musalsal na kijiyo

ya rab-e-zualjalal mire ai khuda-e-dasht

majnun ko dekh mere dware pe a gaya

kasa utha ke kahta hai wahshat bara-e-dasht

jaise kisi ki sans ukharti hui lage

jaise kisi ko ras na ae hawa-e-dasht

tujh par jo nind khwab ka dohra azab hai

to kyun na tujh pe phunk dun parh kar dua-e-dasht