Arooz is now on the App Store, for iPhone and iPad. Download →

All poetry

گلوں پہ خاک محن کے سوا کچھ اور نہیں

Darshan Singh (1921–1989)

گلوں پہ خاک محن کے سوا کچھ اور نہیں

چمن میں یاد چمن کے سوا کچھ اور نہیں

کہاں کی منزل رنگیں سحر تو ہونے دو

ہمارے خواب تھکن کے سوا کچھ اور نہیں

یہ شام غربت دل ہے یہاں چراغ کہاں

خیال صبح وطن کے سوا کچھ اور نہیں

نگاہ شوق مسلسل اسی کو چھیڑے جا

جبیں پہ جس کی شکن کے سوا کچھ اور نہیں

دیار عشق میں تم کیوں کھڑے ہو اہل ہوس

یہاں تو دار و رسن کے سوا کچھ اور نہیں

سواد شام خزاں ہے تو ہو ہمیں کیا غم

نظر میں صبح چمن کے سوا کچھ اور نہیں

کرے تلاش جنوں ظلمت خرد سے کہو

جنوں کرن ہے کرن کے سوا کچھ اور نہیں

ہماری نغمہ سرائی کے واسطے درشنؔ

ہواۓ گنگ و جمن کے سوا کچھ اور نہیں