جانے کس واسطے دل چشم کرم مانگے ہے

جانے کس واسطے دل چشم کرم مانگے ہے

زندگی آپ سے پھر دیدۂ نم مانگے ہے

ہم کہاں جائیں گے اب تیری گلی سے اٹھ کر

کس کا دل ہے جو یہاں دیر و حرم مانگے ہے

مجھ کو پھولوں کی ہوس ہے نہ تو موتی کی تلاش

کاسۂ چشم مرا دست کرم مانگے ہے

چشم نم کو کسی دامن کی تمنا ہی سہی

دل بیتاب مگر آپ کا غم مانگے ہے

جانے کس واسطے اک شخص کی بہکی ہوئی چال

ہر قدم آپ کے ہی نقش قدم مانگے ہے

کوئی دیوانہ تمناؤں کو زخمی پا کر

زندگی بھر کے لئے رنج و الم مانگے ہے

آئنہ خانوں کی یک رنگی سے اکتا کے رئیسؔ

آذر وقت بھی پتھر کے صنم مانگے ہے

jane kis waste dil chashm-e-karam mange hai

zindagi ap se phir dida-e-nam mange hai

ham kahan jaenge ab teri gali se uth kar

kis ka dil hai jo yahan dair-o-haram mange hai

mujh ko phulon ki hawas hai na to moti ki talash

kasa-e-chashm mira dast-e-karam mange hai

chashm-e-nam ko kisi daman ki tamanna hi sahi

dil-e-betab magar ap ka gham mange hai

jane kis waste ik shakhs ki bahki hui chal

har qadam ap ke hi naqsh-e-qadam mange hai

koi diwana tamannaon ko zakhmi pa kar

zindagi bhar ke liye ranj-o-alam mange hai

aina khanon ki yak rangi se ukta ke rais

azar-e-waqt bhi patthar ke sanam mange hai