ہمیں تو ایک ہی چہرہ دکھائی دیتا ہے

ہمیں تو ایک ہی چہرہ دکھائی دیتا ہے

جسے بھی دیکھیے اپنا دکھائی دیتا ہے

یہ کس نے ایسے اجالوں کی آرزو کی تھی

ہر ایک گھر یہاں جلتا دکھائی دیتا ہے

نئی سحر نے اجالے جنم دئے ہیں مگر

یہ خواب پھر بھی ادھورا دکھائی دیتا ہے

یہاں جو بانٹتا پھرتا ہے تشنگی کا بھرم

مجھے تو خود بھی وہ پیاسا دکھائی دیتا ہے

تلاش ہے مجھے اس مہرباں کی مدت سے

جو محفلوں میں بھی تنہا دکھائی دیتا ہے

دھواں ہے جلتے ہوئے گھر سلگتے نظارہ

میں کیا بتاؤں کہ کیا کیا دکھائی دیتا ہے

اسے بھی کیجیے اپنے گروہ میں شامل

یہ شخص اپنے ہی جیسا دکھائی دیتا ہے

یہ کیسی آگ میں ہم لوگ جل رہے ہیں رئیسؔ

ہر اک وجود پگھلتا دکھائی دیتا ہے

hamen to ek hi chehra dikhai deta hai

jise bhi dekhiye apna dikhai deta hai

ye kis ne aise ujalon ki arzu ki thi

har ek ghar yahan jalta dikhai deta hai

nai sahar ne ujale janam diye hain magar

ye khwab phir bhi adhura dikhai deta hai

yahan jo bantta phirta hai tishnagi ka bharam

mujhe to khud bhi wo pyasa dikhai deta hai

talash hai mujhe is mehrban ki muddat se

jo mahfilon mein bhi tanha dikhai deta hai

dhuan hai jalte hue ghar sulagte nazzara

main kya bataun ke kya kya dikhai deta hai

use bhi kijiye apne giroh mein shamil

ye shakhs apne hi jaisa dikhai deta hai

ye kaisi ag mein ham log jal rahe hain rais

har ik wajud pighalta dikhai deta hai