غموں سے رشتہ ہے اپنا بھی دوستی کی طرح

غموں سے رشتہ ہے اپنا بھی دوستی کی طرح

ملے ہیں اشک بھی ہم کو یہاں ہنسی کی طرح

کرم کی زحمت بے جا کا شکریہ لیکن

تمہارے درد کو چاہا ہے زندگی کی طرح

میں اپنا درد لیے اب کہاں کہاں جاؤں

مجھے رفیق بھی ملتے ہیں اجنبی کی طرح

شریف لوگ بھی ہوتے ہیں مصلحت کا شکار

اجالے آج بھی ملتے ہیں تیرگی کی طرح

یہ کس نے شمعیں جلائی ہیں اپنی یادوں کی

اندھیرے گھر میں ہے یہ کون روشنی کی طرح

کسی خیال میں اکثر شگفتہ رہتا ہوں

کوئی خیال ہے پھولوں کی تازگی کی طرح

یہ اور بات کہ اب میں رئیسؔ محفل ہوں

غریب شہر کبھی تھا میں آپ ہی کی طرح

ghamon se rishta hai apna bhi dosti ki tarah

mile hain ashk bhi ham ko yahan hansi ki tarah

karam ki zahmat be ja ka shukriya lekin

tumhare dard ko chaha hai zindagi ki tarah

main apna dard liye ab kahan kahan jaun

mujhe rafiq bhi milte hain ajnabi ki tarah

sharif log bhi hote hain maslahat ka shikar

ujale aj bhi milte hain tirgi ki tarah

ye kis ne shamen jalai hain apni yadon ki

andhere ghar mein hai ye kaun raushni ki tarah

kisi khayal mein aksar shagufta rahta hun

koi khayal hai phulon ki tazgi ki tarah

ye aur bat ke ab main rais-e-mahfil hun

gharib-e-shahr kabhi tha main ap hi ki tarah