دنیا سے آج جذب وفا مانگتا ہوں میں

دنیا سے آج جذب وفا مانگتا ہوں میں

یہ جرم ہے اگر تو سزا مانگتا ہوں میں

کس موڑ پر حیات کے چھوڑا ہے تم نے ساتھ

اک اک سے آج اپنا پتہ مانگتا ہوں میں

میں نے تو کی تھی درد مسلسل کی آرزو

تم کو گماں ہوا کہ دوا مانگتا ہوں میں

رعنائی بہار بڑھانے کے واسطے

تیرا جمال تیری ادا مانگتا ہوں میں

برساؤ مجھ پہ سنگ بنام خلوص عشق

اپنے کئے کی آپ سزا مانگتا ہوں میں

تم مانگتے ہو ساری خدائی تو مانگ لو

اپنے لیے تو صرف خدا مانگتا ہوں میں

کیا جانے اب سمیٹ کے ساری تباہیاں

اس دور اضطراب سے کیا مانگتا ہوں میں

قاتل کو غم گسار سمجھتا ہوں اب رئیسؔ

مقتل میں زندگی کی دعا مانگتا ہوں میں

duniya se aj jazb-e-wafa mangta hun main

ye jurm hai agar to saza mangta hun main

kis mor par hayat ke chhora hai tum ne sath

ik ik se aj apna pata mangta hun main

main ne to ki thi dard musalsal ki arzu

tum ko guman hua ke dawa mangta hun main

raanai-e-bahar barhane ke waste

tera jamal teri ada mangta hun main

barsau mujh pe sang banam-e-khulus-e-ishq

apne kiye ki ap saza mangta hun main

tum mangte ho sari khudai to mang lo

apne liye to sirf-e-khuda mangta hun main

kya jane ab samet ke sari tabahiyan

is daur iztirab se kya mangta hun main

qatil ko gham gusar samajhta hun ab rais

maqtal mein zindagi ki dua mangta hun main