وقت کی تیز روی دیکھ کے ڈر جاتے ہیں

وقت کی تیز روی دیکھ کے ڈر جاتے ہیں

لوگ جیتے ہیں کچھ اس طرح کہ مر جاتے ہیں

زندگانی تری عظمت کو بڑھانے والے

مسکراتے ہوئے مقتل سے گزر جاتے ہیں

بزم یاراں ہو کہ دشت شب تنہائی ہو

زخم بھرنے پہ جب آتے ہیں تو بھر جاتے ہیں

یہ شب و روز بھی اوراق پریشاں کی طرح

بارہا وقت کی آندھی میں بکھر جاتے ہیں

کتنی یادوں سے الجھتی ہے مری تنہائی

کتنے طوفان مرے سر سے گزر جاتے ہیں

دور رہ کر بھی کبھی شکوۂ دوری نہ رہا

آپ ہی آپ ہیں جس سمت جدھر جاتے ہیں

اپنی پلکوں پہ سجائے ہوئے اشکوں کے چراغ

کچھ تو کہئے کہ رئیسؔ آپ کدھر جاتے ہیں

waqt ki tez rawi dekh ke dar jate hain

log jite hain kuchh is tarah ke mar jate hain

zindagani tiri azmat ko barhane wale

muskurate hue maqtal se guzar jate hain

bazm-e-yaran ho ke dasht-e-shab-e-tanhai ho

zakhm bharne pe jab ate hain to bhar jate hain

ye shab-o-roz bhi auraq-e-pareshan ki tarah

barha waqt ki andhi mein bikhar jate hain

kitni yadon se ulajhti hai miri tanhai

kitne tufan mire sar se guzar jate hain

dur rah kar bhi kabhi shikwa-e-duri na raha

ap hi ap hain jis samt jidhar jate hain

apni palkon pe sajae hue ashkon ke charagh

kuchh to kahiye ke rais ap kidhar jate hain