نہ جانے وعدے کا کیوں اعتبار اب بھی ہے

نہ جانے وعدے کا کیوں اعتبار اب بھی ہے

گزر گئی ہے شب اور انتظار اب بھی ہے

کہو تو کہنے کو کہہ دیں کہ شاد ہے دنیا

جو بے قرار تھا وہ بے قرار اب بھی ہے

غرض کے دوست تھے جتنے وہ اٹھ گئے لیکن

تمہارے در پہ یہی جاں نثار اب بھی ہے

خزاں ہے یا کوئی روٹھی ہوئی بہار ہے یہ

نہیں جو گل تو گلستاں میں خار اب بھی ہے

ادھر تو جامہ دری کر رہے ہیں دیوانے

ادھر وہ کہتے ہیں دامن میں تار اب بھی ہے

ہماری خاک ابھی تک ہے کوئے جاناں میں

مزار گو نہیں لیکن غبار اب بھی ہے

خزاں خزاں ہے بہاروں میں بھی سکون نہیں

جو خار تھا مرے دل میں وہ خار اب بھی ہے

بہار جاتے ہی گو سب بدل گئے نقشے

مری نظر میں وہ جان بہار اب بھی ہے

یہ کہہ رہے ہیں زمانے کے دیکھنے والے

دلوں میں جیسا تھا پہلے غبار اب بھی ہے

بدل گیا ہو زمانہ ہمیں نہیں معلوم

وہ تھا شعار جو اپنا شعار اب بھی ہے

na jane waade ka kyun etibar ab bhi hai

guzar gai hai shab aur intizar ab bhi hai

kaho to kahne ko kah den ke shad hai duniya

jo be qarar tha wo be qarar ab bhi hai

gharaz ke dost the jitne wo uth gae lekin

tumhare dar pe yahi jan nisar ab bhi hai

khizan hai ya koi ruthi hui bahar hai ye

nahin jo gul to gulistan mein khar ab bhi hai

idhar to jama dari kar rahe hain diwane

idhar wo kahte hain daman mein tar ab bhi hai

hamari khak abhi tak hai ku-e-janan mein

mazar go nahin lekin ghubar ab bhi hai

khizan khizan hai baharon mein bhi sukun nahin

jo khar tha mire dil mein wo khar ab bhi hai

bahar jate hi go sab badal gae naqshe

miri nazar mein wo jan-e-bahar ab bhi hai

ye kah rahe hain zamane ke dekhne wale

dilon mein jaisa tha pahle ghubar ab bhi hai

badal gaya ho zamana hamen nahin maalum

wo tha shiar jo apna shiar ab bhi hai