بہار اپنی نہ گل اپنے نہ صحن گلستاں اپنا

بہار اپنی نہ گل اپنے نہ صحن گلستاں اپنا

بنا لیں کیوں نہ ویرانے میں جا کر آشیاں اپنا

سنائیں آہ کس کو قصۂ درد نہاں اپنا

اب آتا ہے نظر نا مہرباں ہر مہرباں اپنا

بتائے کون غربت میں ہے کیا نام و نشاں اپنا

نہ کوئی ہم سخن اپنا نہ کوئی راز داں اپنا

کرشمہ جذب الفت کا یہ دیکھیں دیکھنے والے

وہیں منزل نظر آئی قدم اٹھا جہاں اپنا

شرف حاصل ہوا ہے جب سے اس در کی گدائی کا

زمیں اپنی فلک اپنا ہے مہر آسماں اپنا

شعور آگہی گویا فقط لفظ و بیاں تک ہے

ہے سربستہ ازل سے آج تک راز نہاں اپنا

گماں ہے سینۂ سوزاں میں پھوٹے آبلے دل کے

شرر بن کر جو نکلا چشم سے اشک رواں اپنا

تلاش یار اور اس بے خودی میں ضبطؔ کب ممکن

وہ عالم ہے بتا سکتے نہیں خود ہی نشاں اپنا

bahar apni na gul apne na sehn-e-gulsitan apna

bana len kyun na wirane mein ja kar ashiyan apna

sunaen ah kis ko qissa-e-dard-e-nihan apna

ab ata hai nazar na mehrban har mehrban apna

batae kaun ghurbat mein hai kya nam-o-nishan apna

na koi ham sukhan apna na koi raz dan apna

karishma jazb-e-ulfat ka ye dekhen dekhne wale

wahin manzil nazar ai qadam utha jahan apna

sharaf hasil hua hai jab se us dar ki gadai ka

zamin apni falak apna hai mehr-e-asman apna

shuur-e-agahi goya faqat lafz-o-bayan tak hai

hai sarbasta azal se aj tak raz-e-nihan apna

guman hai sina-e-sozan mein phute able dil ke

sharar ban kar jo nikla chashm se ashk-e-rawan apna

talash-e-yar aur us be khudi mein zabt kab mumkin

wo alam hai bata sakte nahin khud hi nishan apna