میں راز غم عشق سے بیگانہ نہیں ہوں

میں راز غم عشق سے بیگانہ نہیں ہوں

ایسا ہوں پیالہ جو محبت سے ہے لبریز

بھر کر جو چھلک جائے وہ پیمانہ نہیں ہوں

وہ سوز محبت ہوں جو پنہاں رہے دل میں

آ جائے جو لب پر میں وہ افسانہ نہیں ہوں

میں آرزوئے دید میں گھلتا ہوں شب و روز

جو شمع پہ جل جائے وہ پروانہ نہیں ہوں

اب جادۂ الفت میں جنوں راہنما ہے

گم گشتہ منزل ہو وہ فرزانہ نہیں ہوں

پر کیف مئے عشق سے پیمانۂ دل ہے

صد شکر کہ اب تشنۂ خم خانہ نہیں ہوں

داغ دل مجروح ہے ہم رنگ گلستاں

جلووں کا خزانہ ہوں میں ویرانہ نہیں ہوں

خود قلب مرا جلوہ گہ حسن ازل ہے

اے ضبطؔ میں جویائے صنم خانہ نہیں ہوں

main raz-e-gham ishq se begana nahin hun

aisa hun pyala jo mohabbat se hai labrez

bhar kar jo chhalak jae wo paimana nahin hun

wo soz-e-mohabbat hun jo pinhan rahe dil mein

a jae jo lab par main wo afsana nahin hun

main arzu-e-did mein ghulta hun shab-o-roz

jo shama pe jal jae wo parwana nahin hun

ab jada-e-ulfat mein junun rahnuma hai

gum gashta manzil ho wo farzana nahin hun

pur kaif mai-e-ishq se paimana-e-dil hai

sad shukr ke ab tishna-e-kham khana nahin hun

dagh-e-dil majruh hai ham rang gulistan

jalwon ka khazana hun main wirana nahin hun

khud qalb mira jalwa gah husn-e-azal hai

ai zabt mein joya-e-sanam khana nahin hun