کی تو نے لب کشائی تو کس کے حضور کی

کی تو نے لب کشائی تو کس کے حضور کی

اب کرچیاں سمیٹ دل ناصبور کی

کس کے لہو میں شام نہا کر ہے سرخ رو

کس نے چکائی خون سے قیمت غرور کی

صدیوں سے کس کی قبر پہ گریہ کناں ہے رات

لیٹا ہے کون اوڑھ کے چادر یہ نور کی

علم و کمال آپ کی میراث کیا کہا

پرتیں نہ کھولیے میرے تحت الشعور کی

تقدیر جتنا چاہے مجھے در بہ در کرے

مٹی سے خو نہ جائے گی برہان پور کی

پھر با ادب ہیں لفظ و معانی مرے حضور

پھر فوج اتر رہی ہے خیال طیور کی

تفہیم آنجناب یہ غالبؔ کا شعر ہے

کچھ ان کہی بتائیے بین السطور کی

ہم خود سے ہم کلام ہوئے کم نہیں ندیمؔ

جاویں کلیم سیر کریں کوہ طور کی

ki tu ne lab kushai to kis ke huzur ki

ab kirchiyan samet dil-e-nasabur ki

kis ke lahu mein sham naha kar hai surkh ru

kis ne chukai khun se qimat ghurur ki

sadiyon se kis ki qabr pe girya kunan hai rat

leta hai kaun orh ke chadar ye nur ki

ilm-o-kamal ap ki miras kya kaha

paraten na kholiye mere taht alshuur ki

taqdir jitna chahe mujhe dar ba dar kare

mitti se khu na jaegi burhan por ki

phir ba adab hain lafz-o-maani mire huzur

phir fauj utar rahi hai khayal-e-tuyur ki

tafhim anjnab ye ghalib ka sher hai

kuchh an kahi bataiye bain alssutur ki

ham khud se ham kalam hue kam nahin nadim

jawen kalim sair karen koh-e-tur ki