رات کی زلف کہیں تا بہ کمر کھل جائے

رات کی زلف کہیں تا بہ کمر کھل جائے

ہم پہ بھی چاند ستاروں کی ڈگر کھل جائے

تھک گئی نیند مرے خواب کو ڈھوتے ڈھوتے

کیا تعجب ہے مری آنکھ اگر کھل جائے

میرا سرمایہ مرے پاؤں کے چھالوں کی تپک

راستے میں ہی نہ سب زاد سفر کھل جائے

آج دریا نہیں کوزے میں سمانے والا

وقت ہے مجھ پہ مرا زعم ہنر کھل جائے

سب مسافر ہیں نئی راہ کی سب کو ہے تلاش

سب پہ ممکن تو نہیں راہ دگر کھل جائے

اپنی تنہائی میں محبوس ہوں مدت سے ندیمؔ

تو اگر ساتھ ہو دیوار میں در کھل جائے

rat ki zulf kahin ta ba kamar khul jae

ham pe bhi chand sitaron ki dagar khul jae

thak gai nind mire khwab ko dhote dhote

kya taajjub hai miri ankh agar khul jae

mera sarmaya mire paon ke chhalon ki tapak

raste mein hi na sab zad-e-safar khul jae

aj dariya nahin kuze mein samane wala

waqt hai mujh pe mira zaam-e-hunar khul jae

sab musafir hain nai rah ki sab ko hai talash

sab pe mumkin to nahin rah-e-digar khul jae

apni tanhai mein mahbus hun muddat se nadim

tu agar sath ho diwar mein dar khul jae