راز فطرت سے عیاں ہو کوئی منظر کوئی دھن

راز فطرت سے عیاں ہو کوئی منظر کوئی دھن

ساز ہستی سے بھی نکلے کوئی پیکر کوئی دھن

میں وہ آواز جو اب تک ہے سماعت سے پرے

میں وہ نغمہ ابھی اتری نہیں جس پر کوئی دھن

اک غزل چھیڑ کے روتا رہا مجھ میں کوئی

اک سماں باندھ کے ہنستی رہی مجھ پر کوئی دھن

اونگھنے لگتی ہے جب پاؤں کے چھالوں کی تپک

چھیڑ دیتے ہیں مری راہ کے پتھر کوئی دھن

عقل فرمان سناتی رہی ٹوٹا نہ جمود

رقص وحشت کا تقاضا تھا مکرر کوئی دھن

وقت کی لے سے ہم آہنگ جو ہوتا ہوں ندیم

بین کرتی ہے کہیں روح کے اندر کوئی دھن

raz fitrat se ayan ho koi manzar koi dhun

saz-e-hasti se bhi nikle koi paikar koi dhun

main wo awaz jo ab tak hai samaat se pare

main wo naghma abhi utri nahin jis par koi dhun

ik ghazal chher ke rota raha mujh mein koi

ik saman bandh ke hansti rahi mujh par koi dhun

unghne lagti hai jab paon ke chhalon ki tapak

chher dete hain miri rah ke patthar koi dhun

aql farman sunati rahi tuta na jumud

raqs wahshat ka taqaza tha mukarrar koi dhun

waqt ki le se ham ahang jo hota hun nadim

bain karti hai kahin ruh ke andar koi dhun