جس کا بدن گلاب تھا وہ یار بھی نہیں

جس کا بدن گلاب تھا وہ یار بھی نہیں

اب کے برس بہار کے آثار بھی نہیں

پیڑوں پہ اب بھی چھائی ہیں ٹھنڈی اداسیاں

امکان جشن رنگ کا اس بار بھی نہیں

دریا کے التفات سے اتنا ہی بس ہوا

تشنہ نہیں ہیں ہونٹ تو سرشار بھی نہیں

راہوں کے پیچ و خم بھی اسے دیکھنے کا شوق

چلنے کو تیز دھوپ میں تیار بھی نہیں

بچھڑے ہوؤں کی یاد نبھاتے ہیں جان کر

ورنہ کسی کو بھولنا دشوار بھی نہیں

جتنا ستم شعار ہے یہ دل یہ اپنا دل

اتنے ستم شعار تو اغیار بھی نہیں

اہل ہنر کے باب میں اس کا بھی ذکر ہو

فکریؔ کو ایسی بات پہ اصرار بھی نہیں

jis ka badan gulab tha wo yar bhi nahin

ab ke baras bahar ke asar bhi nahin

peron pe ab bhi chhai hain thandi udasiyan

imkan jashn rang ka is bar bhi nahin

dariya ke iltifat se itna hi bas hua

tishna nahin hain hont to sarshar bhi nahin

rahon ke pech-o-kham bhi use dekhne ka shauq

chalne ko tez dhup mein tayyar bhi nahin

bichhre huon ki yad nibhate hain jan kar

warna kisi ko bhulna dushwar bhi nahin

jitna sitam shiar hai ye dil ye apna dil

itne sitam shiar to aghyar bhi nahin

ahl-e-hunar ke bab mein us ka bhi zikr ho

fikri ko aisi bat pe israr bhi nahin