کسی کا نقش اندھیرے میں جب ابھر آیا

کسی کا نقش اندھیرے میں جب ابھر آیا

اداس چہرہ شب درد کا نکھر آیا

کھلے کواڑوں کے پیچھے چھپا تھا سناٹا

سفر سے ہارا مسافر جب اپنے گھر آیا

جواز ڈھونڈے وہ اپنے شکستہ خوابوں کا

میں اس کی آنکھوں سے ایسے سوال کر آیا

وہ عکس عکس خیالوں کا آئنہ نکلا

مجھے وہ شخص اجالے میں جب نظر آیا

اکھڑتی سانسوں میں کیا تھا بتاؤں کیا فکریؔ

یہی سمجھ لو کہ قصہ تمام کر آیا

kisi ka naqsh andhere mein jab ubhar aya

udas chehra shab dard ka nikhar aya

khule kiwaron ke pichhe chhupa tha sannata

safar se hara musafir jab apne ghar aya

jawaz dhunde wo apne shikasta khwabon ka

main us ki ankhon se aise sawal kar aya

wo aks aks khayalon ka aina nikla

mujhe wo shakhs ujale mein jab nazar aya

ukharti sanson mein kya tha bataun kya fikri

yahi samajh lo ke qissa tamam kar aya