رنگین خواب آس کے نقشے جلا بھی دے

رنگین خواب آس کے نقشے جلا بھی دے

جاں پہ بنی ہے روشنی اس کو بجھا بھی دے

ناموس ضبط بوجھ ہے کب تک لئے پھروں

ساری امیدیں چھین کے مجھ کو رلا بھی دے

پہنچا ہے کس کی کھوج میں حد زوال تک

گم ہو گیا ہے کون تو اس کا پتا بھی دے

بے چارگی کی رات کے غار سیاہ سے

قید سکوت توڑ کے کوئی صدا بھی دے

ہر آئنے پہ وقت کی انگلی کے داغ ہیں

مٹ جو سکیں یہ داغ تو ان کو مٹا بھی دے

اس دشت بے گیاہ میں مجبور ہوں کھڑا

منزل کا کچھ نشان دے رستا بتا بھی دے

جس پہ رتوں کے ہاتھ کی تحریر ہے لکھی

فکریؔ وہ اپنے جسم کی دیوار ڈھا بھی دے

rangin khwab as ke naqshe jala bhi de

jan pe bani hai raushni us ko bujha bhi de

namus-e-zabt bojh hai kab tak liye phirun

sari ummiden chhin ke mujh ko rula bhi de

pahuncha hai kis ki khoj mein had-e-zawal tak

gum ho gaya hai kaun to us ka pata bhi de

be chargi ki rat ke ghar-e-siyah se

qaid-e-sukut tor ke koi sada bhi de

har aine pe waqt ki ungli ke dagh hain

mit jo saken ye dagh to un ko mita bhi de

is dasht-e-be giyah mein majbur hun khara

manzil ka kuchh nishan de rasta bata bhi de

jis pe ruton ke hath ki tahrir hai likhi

fikri wo apne jism ki diwar dha bhi de