آنکھ پتھر کی طرح عکس سے خالی ہوگی

آنکھ پتھر کی طرح عکس سے خالی ہوگی

خون ناحق کی مگر جسم پہ لالی ہوگی

مل کے بیٹھیں گے وہی لوگ ادھورے آدھے

پھر وہی میز وہی سرد پیالی ہوگی

ایسے موسم میں وہ چپ چاپ نظر جو آیا

اس نے آنکھوں میں کوئی شکل بسا لی ہوگی

میں نے جو چیز گنوا دی اسے ہیرا کہہ کے

کسی نادار مسافر نے اٹھا لی ہوگی

اس کو لفظوں میں اتاروں تو ورق ہوں روشن

اس کی تصویر بنا لوں تو مثالی ہوگی

مل بھی جائے مری خواہش کا صلہ جو مجھ کو

روح اپنی وہی مجبور سوالی ہوگی

یار فکریؔ یہ چمکتے ہوئے جگنو رکھ لے

رات جنگل کی ابھی اور بھی کالی ہوگی

ankh patthar ki tarah aks se khali hogi

khun-e-nahaq ki magar jism pe lali hogi

mil ke baithenge wahi log adhure adhe

phir wahi mez wahi sard piyali hogi

aise mausam mein wo chup chap nazar jo aya

us ne ankhon mein koi shakl basa li hogi

main ne jo chiz ganwa di use hira kah ke

kisi nadar musafir ne utha li hogi

us ko lafzon mein utarun to waraq hun raushan

us ki taswir bana lun to misali hogi

mil bhi jae miri khwahish ka sila jo mujh ko

ruh apni wahi majbur sawali hogi

yar fikri ye chamakte hue jugnu rakh le

rat jangal ki abhi aur bhi kali hogi