عجیب رت ہے درختوں کو بے زباں دیکھوں

عجیب رت ہے درختوں کو بے زباں دیکھوں

دیار شام میں آہوں کا میں دھواں دیکھوں

چہار سمت سے آئی تھی برف کی آندھی

کہیں نہ پھول نہ رنگوں کی تتلیاں دیکھوں

یقین ان کو دلاؤں چمکتے سورج کا

حصار شب میں جو سہمے ہوئے مکاں دیکھوں

زمیں کو تو نے ڈرایا سدا مصائب سے

کبھی تجھے بھی ہراساں اے آسماں دیکھوں

لبوں پہ جس کے مسلسل پکار پانی کی

اسی کی آنکھ سے دریا بھی اک رواں دیکھوں

لہو لہان تو کوئی نظر نہیں آتا

لہو میں ڈوبی مگر سب کی انگلیاں دیکھوں

ہمارے عہد کے لوگوں کو کیا ہوا فکریؔ

سبھوں میں بجھتی ہوئی آگ کا سماں دیکھوں

ajib rut hai darakhton ko be zaban dekhun

dayar-e-sham mein ahon ka main dhuan dekhun

chahar samt se ai thi barf ki andhi

kahin na phul na rangon ki titliyan dekhun

yaqin un ko dilaun chamakte suraj ka

hisar-e-shab mein jo sahme hue makan dekhun

zamin ko tu ne daraya sada masaib se

kabhi tujhe bhi hirasan ai asman dekhun

labon pe jis ke musalsal pukar pani ki

usi ki ankh se dariya bhi ik rawan dekhun

lahu luhan to koi nazar nahin ata

lahu mein dubi magar sab ki ungliyan dekhun

hamare ahd ke logon ko kya hua fikri

sabhon mein bujhti hui ag ka saman dekhun