ان لوگوں میں رہنے سے ہم بے گھر اچھے تھے

ان لوگوں میں رہنے سے ہم بے گھر اچھے تھے

کچھ دن پہلے تک تو سب کے تیور اچھے تھے

دیکھ رہا ہے جس حیرت سے پاگل کر دے گا

آئینے سے ڈر لگتا ہے پتھر اچھے تھے

نادیدہ آزار بدن کو غارت کر دے گا

زخم جو دل میں جا اترے ہیں باہر اچھے تھے

رات ستاروں والی تھی اور دھوپ بھرا تھا دن

جب تک آنکھیں دیکھ رہی تھیں منظر اچھے تھے

آخر کیوں احسان کیا ہے زندہ رکھنے کا

ہم جو مر جاتے تو بندہ پرور اچھے تھے

آنکھیں بھر آئی ہیں فیصلؔ ڈوب گئے ہیں لوگ

ان میں کچھ ظالم تھے لیکن اکثر اچھے تھے

un logon mein rahne se ham be ghar achchhe the

kuchh din pahle tak to sab ke tewar achchhe the

dekh raha hai jis hairat se pagal kar dega

aine se dar lagta hai patthar achchhe the

nadida azar badan ko gharat kar dega

zakhm jo dil mein ja utre hain bahar achchhe the

rat sitaron wali thi aur dhup bhara tha din

jab tak ankhen dekh rahi thin manzar achchhe the

akhir kyun ehsan kya hai zinda rakhne ka

ham jo mar jate to banda parwar achchhe the

ankhen bhar ai hain faisal dub gae hain log

un mein kuchh zalim the lekin aksar achchhe the