کسی نے کیسے خزانے میں رکھ لیا ہے مجھے

کسی نے کیسے خزانے میں رکھ لیا ہے مجھے

اٹھا کے اگلے زمانے میں رکھ لیا ہے مجھے

وہ مجھ سے اپنے تحفظ کی بھیک لے کے گیا

اور اب اسی نے نشانے میں رکھ لیا ہے مجھے

میں کھیل ہار چکا ہوں تری شراکت میں

کہ تو نے مات کے خانے میں رکھ لیا ہے مجھے

مرے وجود کی شاید یہی حقیقت ہے

کہ اس نے اپنے فسانے میں رکھ لیا ہے مجھے

شجر سے بچھڑا ہوا برگ خشک ہوں فیصلؔ

ہوا نے اپنے گھرانے میں رکھ لیا ہے مجھے

kisi ne kaise khazane mein rakh liya hai mujhe

utha ke agle zamane mein rakh liya hai mujhe

wo mujh se apne tahaffuz ki bhik le ke gaya

aur ab usi ne nishane mein rakh liya hai mujhe

main khel har chuka hun tiri shirakat mein

ke tu ne mat ke khane mein rakh liya hai mujhe

mire wajud ki shayad yahi haqiqat hai

ke us ne apne fasane mein rakh liya hai mujhe

shajar se bichhra hua barg-e-khushk hun faisal

hawa ne apne gharane mein rakh liya hai mujhe