نئی نئی صورتیں بدن پر اجالتا ہوں

نئی نئی صورتیں بدن پر اجالتا ہوں

لہو سے کیسے عجیب منظر نکالتا ہوں

وہ دل میں اتریں تو ایک ہو جائیں روشنی دیں

دھنک کے رنگوں کو اپنی آنکھوں میں ڈالتا ہوں

زمین تلووں سے آ چمٹتی ہے آگ بن کر

ہتھیلیوں پر جب آسماں کو سنبھالتا ہوں

ہوا میں تھوڑا سا رنگ اترے سو اس لیے میں

گلاب کی پتیاں فضا میں اچھالتا ہوں

کوئی نہیں تھا جو اس مسلسل صدا کو سنتا

یہ میں ہوں جو اس دیے کو سورج میں ڈھالتا ہوں

طریرؔ سانسوں کا رنگ نیلا ہوا تو جانا

خبر نہیں تھی یہ سانپ ہیں جن کو پالتا ہوں

nai nai suraten badan par ujalta hun

lahu se kaise ajib manzar nikalta hun

wo dil mein utren to ek ho jaen raushni den

dhanak ke rangon ko apni ankhon mein dalta hun

zamin talwon se a chimtti hai ag ban kar

hatheliyon par jab asman ko sambhalta hun

hawa mein thora sa rang utre so is liye main

gulab ki pattiyan faza mein uchhalta hun

koi nahin tha jo is musalsal sada ko sunta

ye main hun jo is diye ko suraj mein dhalta hun

tarir sanson ka rang nila hua to jana

khabar nahin thi ye sanp hain jin ko palta hun